قال هاني شاكر، نقيب الموسيقيين: “النقابة خسرتني كتير أوي، وأديت فرصة لناس كتير أوي إنها تتكلم، وقاطعته الإعلامية سما إبراهيم مقدمة برنامج “حبر سري” المذاع على القاهرة والناس: “خسرت صحابك”، ليرد أمير الغناء العربي: خسرتني صحابي طبعا لأن كل واحد بيتكلم لمصلحته، وأنا شايف إن اللي أنا بعمله هو ده الصح، فممكن جدا نخسر بعض ليه لأ”.
أسباب منع الفلاشة ومنع المهرجانات
عما تردد من أنباء حول أسباب منع الفلاشة ومنع المهرجانات بضغط من الموسيقيين اللي أعددهم كبير في النقابة، قال هاني شاكر: الكلام ده مش مظبوط، إحنا كنا واخدين قرار الفلاشة ده من بدري، يمكن من بداية كورونا في المجلس، فأول ما الدنيا فتحت قلت نشغل الناس، وناس كتير اشتكوا، وأنا مسئول عنهم قدام ربنا، فمكنش ينفع حد يطلع على المسرح ويحط فلاشة ويضحك على الناس، والناس المحترمة قاعدين في بيوتهم من غير شغل”.
وأضاف هاني شاكر نقيب الموسيقيين، إن المهرجانات لو أصبحت لون سائد في العالم، تبقى كارثة، دي يبقى يوم القيامة قرب، مع احترامي للمهرجانات والناس اللي بيحبوها ما ينفعش إن الصورة اللي متصدرة للفن المصري هي مطربي المهرجانات، لتقاطعه مقدمة البرنامج قائلة: حضرتك سمعت الملحوظة اللي بتقول إن ظلم جدا ان شباب في العشرينيات يقدمهم ناس كبار، مع اختلاف الجيل ده عن الجيل ده، ليرد نقيب الموسيقيين قائلا: إن الولاد الجدد دول لما بيجيوا يمتحنوا، الناس اللي بيمتحنوهم بيبقوا عايزين يشوفوا الموهبة موجودة ولا لأ.
هاني شاكر عن اختبار مطربي المهرجانات: إحنا بنقولهم بتعرفوا تغنوا ولا لأ
وتابع هاني شاكر خلال حلوله ضيفا على برنامج “حبر سري” الذي تقدمه الإعلامية سما إبراهيم على قناة “القاهرة والناس”: واللجنة اللي بتمتحن مطربي المهرجانات بيبقوا عايزين يعرفوا هل عندهم استعداد ولا لأ إلى جانب الموهبة، لكن هو مش بيقولوا تعالى غنيلي أم كلثوم ولا عبد الوهاب، هو بيقولوا أنت بتعرف تغني ولا لأ، بتعرف تسمع النوتة وتقولها بصوتك ولا لأ، فأظن مفيش أسهل من كده”.